Hefð er fyrir geitabúskap í Möðrudal á árum áður og er þaðan sprottin áhugi okkar á að viðahalda geitarækt hér á Fjöllum, auk þess sem geiturnar setja líflegan svip á búskapinn. Uppruni geitanna í Möðrudal er gamli stofninn sem var hér áður með kynbótum frá Fjallalækjaseli. Kjörlendi er hér gott fyrir geitur sumarlangt þar sem þær spranga um í klettum, hellum og skútum rétt vestan við bæinn í ævintýralegu landslagi Kjalfellsins. Þar er gróðurfar þeim að skapi og þær ná að halda sínu villta eðli.
Á sumrin förum við gjarnan í Kjalfellið að kvöldlagi með áhugasama ferðamenn, innlenda sem erlenda til að skoða fjölbreytilegt landslag Kjalfellsins og hitta geiturnar sem sumar hverjar þiggja gjarnan brauðbita. Leitið upplýsinga í Fjallakaffi ef þú og þínir hafið áhuga á að kynnast þessum uppátektarsömu og skemmtilegu dýrum.
